Camiño Noia Campos
Camiño Noia Campos é catedrática emérita da Universidade de Vigo. A súa investigación está centrada en varias liñas de traballo, todas coa lingua galega como elemento de cohesión social e como instrumento de creación literaria. Nos últimos anos dedicouse á recolla e clasificación da narrativa tradicional galega. Nese ámbito ten publicados ducias de artigos e libros como Contos galegos de tradición oral (2002), Catálogo tipolóxico do conto galego de tradición oral (2010), Catalogue of Galician Folktales (2021) e O conto de tradición oral (2024). Ademais da súa investigación sobre a narrativa oral galega, publicou distintos traballos sobre a literatura de autoría feminina. En 1981, coa reedición da novela Néveda, recupera a Francisca Herrera para a literatura galega como a primeira narradora do século XX. En 1987, ano en que se lle outorga as Letras Galegas á escritora coruñesa, edita a terceira edición de Néveda cunha ampla introdución e prepara unha antoloxía da súa obra galega.
